الديوان السادس عشر بعنوان خمس وصايا
خمس وصايا عجوز قابلني شخص عجوز حكالي عن الدنيا وبلاويها وقال لي هوصيك وصايا لازم تعيش بيها الأولى إنك تعافر وتركز جدًا على أحلامك حاجات كتير هتوقعك ويمكن تكره أيامك بس اوعى تهاود اليأس وخليك باصص قدامك والتانية عشان ترتاح ما تستناش حد يشيلك البشر بيفتكروا عيوبك وبسهولة ينسوا جميلك ما تتعلقش بوجودهم وإن كنت بتصدق وعودهم هتتعب في الدنيا يا ويلك والتالتة ما يغركش اللمة والجماعة والصحاب اللي بتقابلهم كل ساعة دول أول ما يلاقوا بديل هيركنوك على الشماعة ومهما تكون طيب وأصيل قلوب البشر بياعة والرابعة حافظ على قلبك وما تقتلش نفسك بنفسك ما تبعدش عن اللي حابينك وتروح للي يكتم نفسك وادِّي مشاعرك للي يستاهل ما تصدقش وتقع بالساهل ما تصدقش اللي بيتقال وقيس الحب بالأفعال ياما ناس هيقولوا بنحبك في الآخر هيطلعوا أندال الخامسة داري وجعك وبلاش تحكيه... ما حدش أصلًا هيحس بيه مش هتاخد منهم غير معلش فقل لي يبني هتحكي ليه؟ الفرج مش بإيد إنسان وإن كنت حابب تحكي ف ليك رب رحيم رحمن يسمع منك ويستجيب ومهما انت بعدت عنه من رحمته هيفضل قريب دول خمس وصايا عجوز لف الدنيا وأراضيها ما تستغناش عنهم يبني عشان تقدر تعيش فيها
