الديوان الحادى عشر بعنوان ليه تبعدى
ليه تبعدي مش كنتي بتقولي حبيبي؟ حلمي وأمنيتي ونصيبي؟ طب ليه كل ما أمسك فيكي تبعدي وتسيبي !! بعافر لأجل أكمل معاكي مانتي روحي خلاص ابعدي وروحي وزودي وجعي وجروحي لو هتبقي مبسوطة طول الوقت بثبت لك إني لسة محتاجك وإني مصمم وقت ضعفك أكون قوتك وعلاجك مش كنتي بتقولي إني كل شيء ليكي وعمالة تحلفي و توعدي طب ليه تبعدى؟ وتتعبي قلبي وياكي ده أنا الشخص اللي بهواكي عرفيني إيه اللي خلاكي تكرهي وجودي في حياتك ده أنا كنت ليكي درع ومدد كنت ليكي حماية وسند في أشد أوقاتك!! وقت أما الكل سابك أنا خدتك في حضني أنا كنت كاس بتصبي فيه حزنك فوق حزني وبرضو كنت بتحمل بدوس على نفسي وأكمل نسيتي كل شيء عملته لأجلك؟ دوستي على حبنا برجلك وبسهولة عايزة تمشي!! لو كنت غلطت في حقك أنا آسف حبي ليكي حزام ناسف قادر يقضي على الكون بحاله أرجوكي سيبي قلبي في حاله وما تقتلينيش مانتي عارفة إنك لو بعدتي عني هموت ومش هقدر أعيش الراجل بيبان قوي من برة لكن ممكن تقتليه بكلمة وبكلامك ليا النهارده كإنك دبحتيني بسكينة تلمة لكن لسة بتألم وفيا الروح مش قادر أصدق انك عايزة كل شيء بيننا يروح إزاي يعني طبيب بيداوي جروحك يطلع في الآخر مجروح؟! ولا ده جزاء اللي يصون حبيبته؟ تضحك عليه وتخدعه ولو ما سابتهوش لأجل غيره بتسيبه عشان توجعه
