الديوان التاسع بعنوان رنت عليا
رنت عليا نص الليل... صوتها كان غريب المرادي قالت لي خلاص مش هنكمل جاي لي عريس والقلب راضي شاب طيب ومعاه فلوس هيعيشني فوق البساط وعلى فكرة بيغير جدًا ورافض تمامًا أي اختلاط عشان كده دي آخر مكالمة وعلاقتنا لازم تنساها أنا دلوقتي ملك غيرك دور على واحدة تبقى معاها قلت لها إزاي يعني طب وكل الحب اللي فات إزاي هنساكي أصلا ده أنا فيا ليكي كوم حاجات ذكرايتنا وسهرنا لوش الفجر وقصايدي اللي اتكتبت فيكي قلبي اللي سابني لأجل يجيلك وعينيا اللي عاشقة عينيكي مش قولتيلي إنك ليا؟ واتفقنا نجيب ندى ونور راح فين الكلام ده كله وكإنه دخان بخور ردت عليا بلا مبالاه عادي بقا انساني يا عم اللي عدى كان كله هزار خلينا دلوقتي في الأٱهم هتقدر تنسى أو لا مشكلتك انت أنا مالي جات لي فرصة حلوة ومن حقي أبص لحالي معرفش ليه حاولت أقنعها ترجع تفكر من تاني رغم إن كلامها صريح وواضح إنها بيعاني نهايه كلامنا قالت عيش حياتك وطنش سألتها هنتكلم تاني ضحكت وقالت ماظنش وانتهت قصة حب بسبب طرف خدَّاع أول ما شاف بديل استغنى عني وباع قطعت مشاعري بإيدها ورمتها في أقرب سله كانت فاضية فقالت تلعب بيا وتتسلى فيه ناس بتدخل علاقات واخدينها هزار في هزار مش مدركين أبدًا إن وجع القلوب كالنار نظرة لطيفة وكلمة حلوة واحنا غلابة بنتخدع وتملي اللي بيحب بجد هو حقيقي اللي بيتوجع
