الفصل الخامس (اللعنة الخامسة)
انصدم أبويا وقالها..بتقولي ايه؟ _ ازاي؟ _ انتِ!.... سكت ووشه مكنش يتفسر..والندم بان عليه.. مهما قال مبحبهاش..كان بيعشقها ولما جه يموت متمناش غيرها..يموت بين ايدها، وينظر بس في عينها… بس نقول ايه..منه لله اللي بياذي.. الصمت بتاع أبويا طال..طال اوي ومردش بقى واقف زي التمثال متخشب، وهي بتقرب مني، وبتبوسني، وعملت كدا مع اختي .. ودموعها نزلت وهي بتقول سامحوني..مش بإيديا.. وخرجت زي ما دخلت من غير شنطة هدومها..حتى.. وسلمته كل حاجه ...وقالتله الهدوم دي من فلوسك، أنا متجوزاك من غير أي حاجه كتر خيرك..والدهب كمان..أنا أبويا الله يرحمه لما جوزني ليك كان راجل فقير، وعمي الله يرحمه كان غني..واتكفل بكل شيء..فأنا زي ما دخلت هخرج. وفعلا خرجت..جريت أنا واختي نمسك فيها، بس هي خلاص كانت حسمت أمرها.. خرجت امي من هنا، والصبح لقينا ست الحسن والجمال اللي فضلها ابويا علي امنا، في مكانها وفي اوضتها...بعد ليلى مبطلناش فيها أنا واختي بكا.. ابويا كان بيدبل من فراق أمي، بس مش عارف ياخد موقف..ولا فايق لنفسه، ولا عارف بيحصل ايه، ولا ليه؟؟ ساعات يحنلها وساعات يشتم ويسب فيها..بعتلها مراسيل كتير ترجع بس مكنتش بترضي وخصوصًا بعد ماعرف إنها حامل في الواد اللي كان بيتمناه..والست الهانم في بطنها بنت بردو...وأنها ضحكت عليه عشان يتجوزها.. وحياتنا احنا..بقت جحيم..مرار في مرار.. ضرب وتعذيب وعيشة زي الخدامين عايشينها..قدام ابويا سمنة على عسل ومن وراه كانت بتقتلنا ضرب..ومن جبروت أبويا كان مانعنا حتي من إن نخطي العتبة اللي جمبنا… وفي ليله..سمعنا صوت امي بتبكي لأبويا تحت شباك اوضتنا، وراه البيت الكبير اللي عايشين فيه، وتقوله إنها نفسها تشوفنا...هاتهم عندي شويه، وخصوصًا إننا ساكنين كلنا في حته واحده، زي بيت عيله كدا..بيوت جار بعضها.. بس ابويا رفض...رفض قاطع، وقتها كنت مفكره أنه زي ما مرات أبويا قالتلنا، أنه بيضغط عليها بينا..عشان ترجع.. بس الزن من مراته خلاه زي الأعمى..لا شايف ولا عارف.. لحد ما جه ميعاد ولادة امي.. واللي حصل ساعتها لا ينكتب ولا ينقري..
