(اللعنة الثانية) الفصل الثانى
ممكن الواحد تخونه الذكريات، وممكن قلبه يمثل القوه ويقدر سهوله يهزم الضعف..بس ازاي يقدر القلب ينسى عشق، ينسى سنين وحاجات كتير رسمها مع اللي اختاره بكل الحب يكون رفيق الدرب. ازاي بس الواحد يقدر بسهوله كده ينسى ويدوس علي عشرة العمر! ازاي واحدة بطيبة أمي يحصل فيها كده… وزاي أنا كنت قاسية كده..وازاي وليه مفوقتش إلا دلوقت؟… أنا لسه فاكره رد فعلها..وكلامها وعتابها..وكبريائها اللي كان كله حب، كبرياء ست فضلت محافظة عليه لحد آخر لحظة في العمر… قبل سنوات… في البيت الكبير..بيت العيله..١٩٨٠ _ماما..ياماما.. _ نعم ياعيون ماما.. _بابا اتأخر أوي ..وانا جعانه..خلي نرجس تحطلي الأكل مبقتش قادرة.. _ نرجس مجتش بقالها كام يوم انتِ ناسية أنها أخدت أجازه عشان تعبانه، بس عيوني ياسما هقوم أحطلك الاكل.. _ طب وانتِ يا ماما مش هتاكلي انتِ وإيمان معايا؟… _ أنا هستنى بابا مينفعش آكل من غيره ما انتِ عارفة..اختك هتاكل معاكِ.. نفخت من روتين ماما اللي بيخليها طول الوقت جعانة وترفض تاكل معانا عشان خاطر بابا..اللي أوقات كتير بيجي متعشي برا وماما بردو تنام جعانه.. _ماشي.. _ الله ياماما أكلك حلو اوي..خليكي اطبخيلنا دومًا...دي نرجس أكلها يقرف .. بضحكة هاديه كالعادة ضحكت أمي و خدتني في حضنها وباستني .. _ بس كده ياست سما..عيوني ..أنت تأمر ياجميل..بس مينفعش نقول كده على نعمة ربنا، ياحبيبتي دا في ناس مش لقيين اللقمه، بلاش تتبطري على النعمة يا سما لتزول منك.. صوت دوشه كبيره جاي من برا البيت خلانا كلنا قومنا اتنفضنا..وصوت زغاريط وراه.. خرجنا برا ورجل أمي اتسمرت في الأرض..وكأن العمر كله وقف بيا وبيها..في اللحظه دي.. لحظه لما نطقت أمي..وهي تايهه: _ ايه ده؟؟ وردت عليها نرجس بكل حقد وجبروت وهي بتعدل في طرحتها اللي يادوب طايله الأرض … _ دي زفة عروسة زي ما انتِ شايفه...زفتي أنا وجوزي… _جوزك..؟؟ نقلت أمي عينها، واحنا زيها عالعريس اللي واقف ..واقف زي التايه..بس بجبروت، جبروت راجل كلنا مش تايهين عنه، بس كنا كلنا عارفين أنه بييجي لحد أمي ويبقي طفل صغير .. .. وبين ست حرباية كلنا كنا عارفين وواخدين بالنا منها إلا الست اللي فتحت لها بيتها واستأمنتها على حالها، ومالها، وعيالها، ست عنيها بتنط منها الفرحه، والشماته..و.. الانتصـار.. وهنا نطقت أمي بعد وقت طويل من الصمت وهي بتنقل عينها بين بابا وبين نرجس اللي الفرح والشماتة بتنط من عينها.. _ أنت اتجوزت يا سلمان...اتجوزت عليا!! وبعدها راحت في دنيا تانية..
