الفصل الحادى عشر (اللعنة الحادية عشر)

اللهم صلِّ صلاة كاملة وسلّم سلاماً تاماً على سيدنا محمد النبي الأميّ الذي تنحل به العقد، وتنفرج به الكرب، وتُقضى به الحوائج، وتنال به الرغائب وحسن الخواتم، ويستسقى الغمام، وعلى آله وصحبه عدد كل معلوم لله.. ــــــــــــــــــــــــــ مديت ايدي بالمية جنيه قال يعني بحسسها هي جاية ليه وإن أنا فهماها.. بس ساعتها اخويا بصلي بصة شفقه على حده على نفس مكسورة.. وقاللي.. ـ شيلي فلوسك دي احنا مش جايين نشحت منك..احنا كنا جايين نوصل صلة الرحم.. اللي انتِ نسيتيها..و لولا دموعها اللي منشفتش من ساعة ماعرفت بمرضك مكنتش خليتها تهوب ناحيه القصر الملكي اللي انتِ عايشه فيه..لا أنا ولا ابويا...في حاجات في الدنيا يا سما لا ينفع تنباع ولا تنشري، ولا ينفع يتقال لحد عليها.. دور وشه يتأمل المكان بعينه بسخريه.. على نظرة تانية أوي موجوعه... كانت باينة أوي في عيونه.. ـ الهلاهليل اللي علينا واللي انتِ قرفانه منها، أحلى وأحسن مليون مره من البراندات اللي بتلبسيها انتِ وعيالك.. احنا صحيح بنقضي عشانا نوم زي ما بتقولي للناس بحالها.. بس احنا راضيين.. وكفاية راحه البال والسلام والهدوء..وان احنا بنيجي آخر الليل نعرف ننام..من غير علاج ولا أدويه.. وأكيد ربنا له حكمه في كدا..مش معترضين.. أول ما سمعت كلمه أدويه اتجننت سيبت كل الكلام ومسكت في الكلمة..أمي كانت بتبصلي بحزن وكسره..وعيونها مليانه دموع بس ماهتمتش كل اللي كان في دماغي.. إنه أكيد بيعايرني عشان أنا تعبانه ومبعرفش أنام غير بالمهدئات..ماهو من ايه..؟ من مرات ابويا واللي عملته فيا انا واخواتي وهي كانت السبب وادتلها الفرصة بتخليها عننا.... ليه مضحتش عشانا..زي ما مهي مضحية عشانه..وعايشه تدلع وتربي فيه.. الغيرة نهشت قلبي وأنا بقارن حالي بحاله.. رغم اللي هو فيه والفقر اللي باين عليه ‘لا اني شيفاه سعيد أحسن مني..مبقتش شايفة ولا عارفه حاجه..وكل اللي في دماغي سؤال واحد.. ليه انا مش سعيده زيه؟ ليه انا أعيش على الأدوية وأنا معايا فلوس..وهو سليم معافى وسعيد بفقره في حضن امه..! ألف ليه وليه لعب بيها الشيطان في دماغي.. شديته بقوة من دراعه..قبل ما يخرج من باب البيت.. وبكل ما فيا ضربته بالقلم على وشه.. شهقت امي..وضربت على قلبها بقوة وصرخت بقهرة: ـ ابني.. ورجعت صرخت تاني، لما شافت مناخير ابنها بتنزف دم.. انا نفسي مش عارفه جبت القوه دي منين..؟ الكل بيقوللي لما بتتعصبي بيبقى فيكِ قوه تهد جبال.. وياما جابولي شيوخ..يفسروا ايه سر التحول اللي بيحصلي والقوه دي! واحد قال تأثير السحر اللي مالي جسمها، اللي مرات ابويا منها لله..دايمًا ساقياه لنا.. انا واخواتي..بس محدش اتأثر قدي أنا من صغري جسمي حساس وبيدخله أي شيء وللأسف أنا ضعيفة الشخصية..وواحد قال ممسوسه واللي عليها اللي بيتحكم فيها.. معرفش..! اخويا رفع وشه..وعينه اتملت بالدموع ولسه هيتكلم..وهينفعل.. امي شدته بسرعه وقالتله.. اوعى اختك الكبيره وضربتك.. شوفت ملامح الجنون في عنيه انا خوفت واترعبت ليمد ايده عليا وساعتها حسيت اني فعلا غلطت.. مكنش لازم اعمل كده.. ـ اوعى تغلط غلطها وتمد ايدك، حلفتك بالله يا عادل..اختك تعبانه..مش دارية بنفسها.. ساعتها اتجننت اكتر.. وصرخت في وشها.. ـ قصدك إن انا مجنونه..وبشد في شعري.. أنا واعيه لكل كلمه بقولها وكل حرف.. قربت مني، وطبطبت عليا.. ـ اهدي يا سما يا حبيبتي..انتِ ست العاقلين.. انا مش دايمالك يا بنتي..وكبرت ونفسي أتطمن عليكوا.. ان انتوا حلوين مع بعض.. نفسي تعتبروا عادل اخوكم وتقربوا من بعض.. ولا اكتر ولا اقل.. يمكن غلطت وأستاهل كرهك..بس حطي نفسك مكاني يا بنتي انا تعبت يا بنتي ومبقتش حمل مناهده وخصام.. انا مبجيش عندك عشان اشحت منك.. انا باجي املي عيني منك ومن اخوكي ومن ولادك.. ولادك اللي هما اغلى منك.. مش بيقولوا أعز الولد ولد الولد يابنتي.. ليه قاسيه كدا..دا من جه بيتك جاب الحق عليك.. نطرت ايدها بحده وقولتلها..ابعدي عني.. مين ده اللي عوزانا نقرب منه.. دا... ابتسمت بسخرية، واخويا واقف يغلي..ولولا ايد امه اللي حيشاه عني متاكدة كان مد ايده وضربني.. شكله شراني ومن دلعها فيه مبيخفش.. ابتسمت بحزن وقالتلي.. ـ حاضر يا سما..مش هتشوفي وشنا تاني.. لو دا اللي هيريحك.. بس بالله عليكِ ابقي سيبي رامز يجيلي.. دا بيخاف منك.. بردي قلبي يا بنتي..يارب ما تدوقي مرارة وحرقة قلبي ـ بصتلها بغل وسخرية.. انا عمري ما هكون زيك..واتخلى عن ولادي.. بطلي تمثيل بقي.. وإياكِ أوفك جمب ولادي واخواتي.. بصتلي ودموعها نزلت.. وقالتلي.. انتِ جايبه القسوه دي منين..؟ انا دلوقت اتأكدت..إنك تربية أبوكِ..و مرات أبوكِ..ياخسارة عليكِ..كنت مفكرة إنك أكتر حد هيحس بيا..بس للأسف مش عارفة أقولك ايه..؟ _ زقتها بقوة، وجنوني زاد..لولا ايد رامز اللي حشتني عنها، وجوزي والبيت كله اتلم علينا، وهي لا حول ليها ولا قوة، ولولا جوزي اللي حايش عادل عني كان موتني.. بصتلي بقهرة وحرقه أول مره أحسها في صوتها، وقالت: _ سلفي عليكِ..تنحطي مكاني وتدوقي مراري..يا سما.. تدوقي قسوة الضنا عليكِ..الضنا بس.. مش حاجه تاني..يا سما.. عشان لو دوقتي اللي أنا دوقته..عمرك ما هتتحملي أبدا يا بنتي.. انا اول ما سمعت كده..جسمي اتلبش وخوفت.. معرفش ايه حصلي.. بقيت عاوزه أمسكها وأقولها اسحبي الدعوة.. متمشيش.. حاوطها اخويا وطبطب على كتفها وباس راسها.. وخرجوا.. معرفش ايه خلاني أخرج خطوتين وراهم..زي المجنونة. وسمعتها بتبكي وبتقوله: ـ انا…… مكنش قصدي أدعي عليها..اختك تعبانة وكل ما أشوفها احس اني ظلمتها..بس والله مكنش بإيدي..يا بني.. يارب ريحني..أنا مشوفتش يوم في حياتي عدل..أنا طول عمري مظلومه..ريحني وخدني عندك بقي.. يمكن ألاقي الراحة شويه.. ـ متبكيش يا امي..اللي حصل دا كان مقدر ومكتوب هي اللي جاحده..وقلبها قاسي، قولتلك بلاش! مسحت دموعها بطرحتها.. ـ متكرههاش يا عادل...دي تعبانة واللي ما تتسمي هاريه بدنها بالسحر والكتابة.. منها لله..ربنا ينتقم منها..ضيعتني وضيعت حياتي..وولادي ـ روحي يا سما يا بنتي..قلبي مسامحك.. سمعته بيضحك ويهون عليها.. ـ الله يا امي انتِ المفروض تشكريها إنها خلتك تطلقي وتتجوزي ابويا وتخلفيني انا.. عادل باشا..ابن طارق الحليوة ابو غمازات اللي بيموت فيكي...ولا انتِ بقى مش بتحبيه والنعمة أروح أقوله.. ضربته بكوعها بخفه..وقالت له..والله ابوك دا الحاجه الحلوة اللي طلعت بيها في حياتي كلها… _ الله يا أمي طب وانا.. _ انت وأخواتك كل حياتي..يارب اجمع شملكم.. خدها اخويا في حضنه ومشي.. كل شويه يبوس راسها..ورجعت انا بصدمة لورا.. انا مش عارفه عملت ليه كدا..؟! ولا ليه هنتها كدا..؟! انا قبل ما هينها هنت نفسي وبليت نفسي بإيدي.. بدعوه.. يمكن مكنتش من قلبها.. بس انقبلت.. في ساعتها.. ولقيت نفسي جسمي بيهدى ويرجع لطبيعته.. وبدأت أأنب نفسي كالعادة.. دعوه الأم وخصوصًا لما تكون محروقه..اكيد ربنا بيقبلها في ساعتها.. دخلت شقتي وقعدت دافنة وشي بين رجليا.. كالعادة.. ندمانة على كل كلمة خرجت مني انا ايه اللي عملته ده..؟ انا فعلا مريضه..وانا عارفه إن فيا حاجه مش طبيعية.. وكرهي لأمي كمان مش طبيعي.. انا قلبي طيب بشهادة الناس كلها..إلا معاها هي.. حتى مع ولادي ضعيفة الشخصية ومليش كلمه عليهم....وعمري ما قولت كلمه إلا وعارضوني وكذبوني.. حتي معاملتهم لأخويا الصغير بقت فيها قله حياء واخويا بدا يتضايق منهم.. بكيت بحرقة..مبقتش عارفة انا فيا ايه؟ ولا عاوزة ايه؟ ـ دخل رامز اخويا عليا.... ـ بتعيطي ليه دلوقت؟ كل مره تعكي الدنيا وتعيطي كدا..؟! فيها ايه لو كلمتيها حلو يا ستي حتى من ورا قلبك.. بصتله بحدة بعد ما افتكرت انه بيروحلها وخايف مني.. -انت بتروحلها من ورايا؟ اخويا خاف، وانكمش في نفسه: ـ انا بس، روحت أعيد عليها والله يا سما..انا.. صرخت فيه وقولتله: تعيد عليها !!! مش دي اللي رمتك وانت حتة لحمة حمرا..مش دي اللي فضلت تعيش تربي ابنها على إنها ترجع وتاخدنا في حضنها.. انت نسيت دا كله..؟! هتفضل غبي لامتى؟ اتنهد بحزن..وقالي..: ـ انتِ ليه كل شويه تفكريني يا سما..انا على فكره سمعت منها..وصدقتها، وعذرتها. حرام عليكِ..امك انظلمت..و يا ستي انا مش عايز اغضب ربنا فيها.. حتى لو كانت السبب..محدش ضامن عمره يا سما.. متزعليش مني..سيبيني أروحلها برضاكِ.. كلام اخويا صدمني..وحسيت فعلا انه كبر مبقاش رامز الصغير اللي بيسمع كلامي..وكلامه فعلا لبشني وخوفني.. وحسيت انى فوقت..ما هي الفوقة والندم مبيجوش إلا لما أصب غيظي فيها..واتكلمت بصدق في نفسي ولنفسي: انا والله مش عارفه ايه بيجرالي اول ما بشوفها..بحس اني لا جسمي ولا لساني اللي بيتحرك ولا عقلي بيفكر اصلا أنا عارفه اني واكله وشاربه سحر من ناحيتها لحد ما عميت وأثر على جسمي وأعصابي بس أنا رافضه العلاج..وزهدته.. بصيت لأخويا اللي بيلبس..عشان يخرج.. وسألته: ـ رايح فين يا رامز..؟ ابتسملي ابتسامته الهادية اللي بتشرح قلبي دايمًا ما هو من جماله تحسه انه ملاك ماشي على الارض..كل ما أشوفه اسمي واصلي..عليه..واخد جمالها في كل حاجه..كانه حته منها..وقالي: رايح الشغل.. ـ فين؟ ـ برا المحافظة، هسافر صد رد وآجي.. ـ خلي بالك من نفسك يا رامز..عشان خاطري.. ـ يا ستي العمر واحد والرب واحد.. ـ بصيت له بخوف بقلبي وحسيت بقبضة بس مهتمتش.. واترددت بس سألته: ـ هو انا عكيت الدنيا اوي معاها..؟ ـ ابتسم بحزن وحسيته هيعيط، وقالي: ـ أنا لو مش عارف انك تعبانة وانه مش بإيدك..كنت كلتك بسناني..انتِ هنتيها اوي يا سما..دي امك..والنبي قال امك ثم امك ثم امك..ثم ابيك.. ـ بكيت وحمدت ربنا إن ولادي مش موجودين..ولا شافوني.. للأسف كل حاجه بعملها بيغلطوني بس افتكرت جوزي، اللي بقي على اخره مني، حاول معايا كتير بس انا برفض العلاج..دايمًا.. آخر مره روحت لشيخ قال.. اني اللي معمولها..معمول بالكبر على العلاج نفسه، ورفض الدوا والأطباء.. وان العمل يتجدد لها كل أول شهر هجري من نفسه.. مبقتش فارقه بقي.. كل حاجة في جسمي بدأت تضعف إلا كرهي لأمي دايمًا في زيادة..ولا بينقص فوقت من شرودي..على ايد رامز..الحنينه.. اللي بتمسح دموعي.. ـ خلي بالك من نفسك يا سما..ومتتعصبيش عشان خاطري.. الدنيا دي فانية ملهاش لازمه..وانتِ أقوى من كدا.. صالحي امك ونضفي قلبك..كلنا مظلومين في الدنيا..كلنا حكايتنا واحده.. حسيت بقبضه أكبر في قلبي.. ـ أنا مش هقدر يا رامز..والله غصب عني..انتو مش حاسين بيا.. ـ كلنا حاسين بيكي وعارفين انك اكتر واحده اتظلمتي.. حتى جوزك حسن، عارفوبيحبك..بس انتِ عليكِ حركات بتجننه..وتخرجيه عن شعوره .. واحد تاني كان عمل زي ابوكِ وجري اتجوز تاني.. بس دا مستحملك ومستحمل تعبك.. فاحنا ايه..نخف شويه..ونقوى كدا.. ضعفك وخوفك دا..هو اللي مخليه يقوي عليكِ ومخلي العيال ميخافوش منك..ويبجحوا فيكي.. دا لوعيل من ولادك شخط فيكي بتخافي ـ غصب عني يا رامز..انت عارف اني بخاف من اقل حاجه.. انا خايفه يا رامز..من دعوة امك.. مد ايده ومسح دموعي وقالي: ـ يا هبله خافي من دعوة حماتك..ومتخافيش من دعوة امك.. دا بيقولك دعوة الأم في الكم..ودعوة الحما في السما..! ـ ضحكت وقولتله..اه وحماتي هرياني دعاوي.. ـ قرب وباس راسي.. وقالي: -خلي بالك يا سما..خلي بالك أوي..اوعي تيجي على حد..ولا تظلمي.. داين تدان..والدنيا دواره وبتلف..واللي بتعمله يا ابن ادم..لازم يتردلك مهما كان. ـ خوفت وقولتله..يعني ايه؟ ـ يعني الديان لا ينام.. يا سما.. فوقي قبل فوات الأوان.. سابني ومشي..وحسيت بقبضه أقوى بقلبي..ونغزه وكلام امي واخويا بيرن في وداني.. انكمشت على روحي واتغطيت ومديت ايدي خدت علاجي رغم اني ما بخدوش بالنهار بس كنت محتاجه أنفصل عن الواقع.. يمكن لما أفوق..تخف حدة الندم والألم اللي حاسة بيه.. من اللي عملته في امي.. دايمًا أعمل العمله واهرب للنوم..جسمي مبيستحملش..ولا فيا طاقه أفضل أأنب نفسي..روحت في النوم وانا بفكر.. ومدرتش بنفسي..غير علي صوت صرخة قويه..بترن في وداني.. قومت اتسند اشوف في ايه وانا جسمي كله بيتنفض وحاسه اني هقع من طولي في أي لحظه.. حسيت أعصابي انهارت.. وسمعتهم بيقولوا، حاجه مكنتش اتوقعها ابدا في أحلامي.. حطيت ايدي على ودني..اكتم صوتهم.. وانا مش مصدقه نفسي.. اكيد بيكدبوا..كدابين..مش معقول.. مدرتش بنفسي.. ولا انا بعمل ايه؟ حسيت اني مش أنا ديا، ولا دي حياتي ولقيت نفسي بصرخ..صرخه قويه.. حسيت من قوتها هزت الكون كله.. ولفت راسي.. وحسيت بدوامه كبيره بتسحبني وايدين من بعيد بتشاورلي.. ايدين انا عرفاها وحفظاها كويس.. وبتقولي.. مع السلامة..هنتقابل تاني. انهرت وروحت في دنيا تانية.. دنيا لا حبيب ولا صاحب هيبقالي.. دنيا فانية والرخيص فيها بقى أغلى من الغالي.. ااه يا دنيا امتي هترأفي بحالي؟.. عشت تايهة مذبذبه..والكل ظالمني.. بيقولوا ليه البكا..والضعف..وانا جنبي اللي ساندني.. ميعرفوش ان من بين كل الدنيا..متمنتش غير امي.. لا مال ولا جاه في الدنيا هاممني.. ااه ياوجع في القلب متأصل.. اه يا ندمي انا والحسره.. دعيتي عليا ياامي..ومكنتش اعرف اني بدعوتك هتأثر