الديوان السادس بعنوان عامل نفسى مرتاح
عامل نفسي مرتاح وبتاع وأنا بصراحة مليان أوجاع نفسي في حضن من ملك الموت بعدها أقول للدنيا وداع طول الوقت بخسر أحلام وناس غاليين معرفش كام وعشان مزودش هموم حد بضحك وأمثل إني تمام وأبكي بحسرة طول الليل على قلة بختي وضعف الحيل كل الناس مش حاسين وأنا بغرق في بحر الويل برجع أفتكر ماضي حزين والقلب يحس بشوق وحنين لناس خدعوه بوعود ياما أتاريهم فترة ومش دايمين فيه اللي باع فيه اللي ساب فيه اللي بدون سبب غاب ما بقاش معايا غير البُكا مصحوب بأعراض اكتئاب روحي بتاخد من قلبي تارها شايفة إن هو سبب دمارها وأهو كل ما فيا بيحارب بعضه ما بقاش عندي حاجة أخسرها قالوا إن العياط وقت النوم مش هيخليك ترجع تقوم وأنا يوميًا بعملها يعني وألاقيني بصحى في نفس اليوم وألقى كل شيء زي ما هوَ أوجاع بالكوم ونار جوه مش نافع أعيش ولا نافع أموت حتى باخد النفس بالقوة مليان أوجاع وبكل صراحة محتاج آخد من تعبي استراحة وأحس إني عشت ولو يوم في هدوء وأمان وراحة يارب عبدك جرحه كبير مش طالب إني أبقى أمير صعبان عليا نفسي بس ريحني واكتب لي الخير
