الديوان الثامن بعنوان ليه كل ما بتمنى
ليه كل ما بتمنى حاجة بلاقيها تروح لغيري؟ ليه مهما أتعب وأحاول الفشل بيكون مصيري؟ أنا مش كافر على فكرة .. لكن حاسس بخنقة وجوايا كلام زهقت من دنيا بايخة بترجعني لورا كل ما أحاول أتقدم خطوة لقدام من قساوتها كلبشتني بدون تهمة وحكمت عليا بإعدام طب يا ريتك نفذتي حكمك بدون ما كل مرة تأجليه سايبة الكل ومستقصداني أنا نفسي أعرف ليه؟! مفتكرش أي شيء حصل لي يخليني أفرح بيه ما ليش نصيب في حب وما عشتش قصة فيها ورود ودباديب ولا ليا نصيب في الصُحبة كلهم بعدوا عني اكمني كئيب في مشنقة ملفوفة حوالين رقبتي ما بتشنقش ولا قادر أخلص منها دنيا عجيبة مستخسرة فيا الفرح ومع ذلك رافضة تبعدني عنها! ماعرفش ليه بتعمل كل ده كإن في تار بيني وبينها كل ما أضحك ضحكة صفرا دموعي تسيل من كتر الأحزان حاسس دايمًا بصعوبة تنفس وجسمي ضعيف همدان عامل زي بيت مايل اتبنى بدون عمدان كل اللي يقابلني بيسألني هو انت ليه حزين على طول بتحسسوني كإتي اخترت الحزن بريموت كنترول لا..ده الحزن بيختار ضحاياه من وسط ناس تايهين أنا لو عليا نفسي أفرح مش عايز أبقى حزين قالوا عليا مجنون..... وعبيط بيكلم نفسه قلوب الناس زي الحجر.... ومحدش حاسس باللي أنا حاسه هو أنا يعني لقيت حد؟..... أحكي له أو يسألني مالي كل البشر بعيدة عني... وما ليش غير خيالي هو الوحيد اللي.... لحد النهارده ما سابنيش والله تعبت من الوحدة ومن الحزن ما بقيتش عايز أعيش بستنى الموت في كل لحظة وبرضو ما بيجيليش كفاياكي قسوة يا دنيا كل اللي فيكي كذب ووهم بييجي على اللي قلبه أبيض دايمًا وتمشيه عكس السهم
