الديوان الثالث بعنوان وحشتينى
وحشتيني وحشتيني... من يوم فراقك صورتك مفارقتش عيني ولا نسيتك ثانية في بُعدك بقيت في دنيا تانية تايه مش لاقي حلول بفكر فيكي على طول وفي كل ذكرى ما بيننا معاكي أنا كنت في جنة وشفت الدنيا بالألوان وقلبي فرح علشان حس بحب وأمان وحس إن الحياة بتتغير لكن تملي الفرحة معايا عمرها قصير... أهو انتي غايبة بقالك فترة معرفش عنك شيء.. مفيش بيننا كلام ولا بالصدفة جمعنا طريق.. وحشتيني بعدد نظرات عيني اللي بصوا لك وحشتيني بعدد مشاعري الصافية اللي ندهوا لك وحشتيني بعدد نبضات قلبي اللي دقوا لك وحشتيني بعدد أوتار روحي اللي عزفوا لك وحشتيني بكل شيء فيا في بُعدك حالتي مش هي وروحي صابها الحزن ويوماتي بتقطع من العذاب آه بس لو ترجعي هفتح لك كل الأبواب.. مش هقابلك بلوم وعتاب ولا هسألك عن سبب الغياب.. وهقفل على الماضي بترباس. ونبدأ مع بعض صفحة جديدة عايزاني أعيش إزاي.. وأنا وروحي عني بعيدة طب على الأقل. أطمن على حالك وظروفك مين اللي بياخدك في حضنه وقت خوفك؟ أنا نفسي أرجع أشوفك.. وأشوف نفسي في عينك يا ست الحُسن فينك؟ وفين أيامنا اللي عشناها؟ قولوا لها إني مُت بلاها والحزن بياخدني وبيوديني إنتي غلطتي؟ مش عارف إللي أعرفه إن إنتي وحشتيني وإن قلبك الطيب لا يمكن يقسى وروحك مش هتقدر تنسى أجمل لحظات عشناها وحياتنا اللي رسمناها وولادنا اللي لسه ماجوش سألتيني هعلمهم إيه دلوقتي بقولك ما يحبوش ولا يسيبوا روحهم في إيد حد عشان والله هيتقتلوا بجد لو بِعِد عنهم وساب لا أنا أكيد كذاب كنت هعرفهم إن الحب جميل وحبي ليكي خير دليل رغم وجعه هو أجمل شيء حصل خلى قلبي وصل لدرجة عالية من الإحساس يا ست البنات يا أغلى الناس يا أشد وجع صاب قلبي وأحلى علاج ملّكتك روحي ولبستك تاج ورضيت إني أبقى خادم لفخامتك على قد ما أقدر صُنت كرامتك حسيتك وقت صمتك لما سابوكي الكل حضنتك بس انتي في الآخر موتتيني يا سمو الملكة وحشتيني وحشني كلامك وسلامك والضحكة اللي تنور كوني وحشني جنانك، ريحة برفانك والجمال اللي بيسحر لي عيوني وحشني غناكي أيامي معاكي والنظرة اللي مش هتبقى بدوني وحشني صوتك وسكوتك وفي بُعدك الله يكون في عوني وحشتني لمسة إيدك وحضنك وأنوارك اللي مفارقاني امتى بقى هتحني وألاقيكي جاية تطمنيني؟ أصعب شيء هو فراقك ارجعي يا حبيبتي وحشتيني
